ATV配音動畫《無敵特務之偽鈔堡壘》配音表

ncyee

《ルバン三世　カリオストロの城》，即《雷朋三世　卡里奧斯特羅之城》，係由宮崎駿編劇並監督，於1979年上映嘅動畫電影，見到個年份都應該體諒佢畫面嘅唔精細。

雖然人物係有啲粗糙，但宮崎駿作品向來風景幽美、動作流暢，全片睇落嚟感覺幾好，係無腦爽類型，睇得幾開心㗎。

講返個粵配，根據不可盡信嘅維基，本片於1990年在ATV播映，當年剪去唔少片段，好多重要劇情都無粵配。聽返其中配音陣容似係80年代中尾段作品，主力係元老級嘅梁政平、盧傑，後起之秀雖然有賴雪芬、陳偉權，但黃志明、陳欣、羅偉傑、雷霆、梁志達、黃玉娟、曾秀清、朱妙蘭等等一個都無。

實話實說，講得係元老級，配音員多數係70年代已經入行，聲線有特色，技巧與經驗亦足夠，不過青春朝氣呢啲嘢好難扮得到，所以聽起嚟會覺得好老成，配少年向嘅動畫係有啲難頂。好似梁政平，雷朋點都30幾啦，梁政平配雷朋，好夾吖，但係睇返《TOUCH》梁政平配上杉達也，都咪話唔出事。

附資源，不過無字幕
飄盤



角色名：配音員：簡介

（出場序）



雷朋：梁政平：風流到接近猥瑣，水火不侵、車撞唔散、跳樓都唔會有事嘅不死怪盗

次元大介：周永光：成日遮住對眼嘅神鎗手，一直唔知佢點瞄準，拍住雷朋撈世界


克莉絲：賴雪芬：卡里奧特羅公國嘅公主，純潔又美麗、堅強但柔弱，長期處於待救狀態嘅花瓶

園丁：林友榮：克莉絲稱呼佢為「金老伯」，外表冷漠，但在雷朋落難時仍願意收留，可見心地唔壞


卡里奧特羅伯爵：盧傑：卡里奧特羅公國嘅攝政大臣，壞蛋，偽鈔集團主腦，傳聞十分好色，但身邊情婦都無個。佢同克莉絲係同族人，血脈同源，但結得婚咁應該唔係直系親屬啩？不過佢都算死得慘，手下想幫佢收屍都難

約特：戴偉光：總管，對伯爵好忠心個款



峰不二子：徐愛貞：出場時扮成女僕潛伏係城堡調查。原作中係女盜賊，本片（粵配版）中自稱係情報員，不過ATV將片名改成無敵特務，即係將雷朋當成係特務？

餐館女侍：黃小英：解說型NPC

伯爵嘅部下：曾秉輝：印刷（偽鈔）部部長，因為技術不過關被伯爵照肺


石川五右衛門：曾秉輝：劍客，把刀似乎乜都劈得開，雖然同雷朋係一夥，但行為上相當獨立


錢形警部：關子棟：雷朋稱呼佢做「老爺」，係個正直到戆居嘅國際刑警，永遠在追捕雷朋嘅途上，對雷朋可謂愛得深沉

塔夫：陳偉權：嚴肅嘅城堡侍衛

國際刑警A：曾秉輝：陪伴錢形警部企係寒風中食杯麵

國際刑警B：陳偉權：通知錢形警部巴黎總部急call

易容成錢形警部嘅雷朋：梁政平

國際刑警總部成員A/B/C：周永光/陳偉權/盧傑

易容成大主教嘅雷朋：梁政平

特政隊成員：陳偉權

snzt

90年代左右用中老年声配后生仔，两个台都差不多

hk112801

有粵語配音都幾好