[轉載自YAHOO新聞][技安都走埋]《叮噹》配音班底得返靜宜

stupidlo · 发表于 2015-4-20 09:55:03

今年一月，陪住大家成長、聲演「叮噹」(現稱多啦A夢)多年嘅無綫資深配音員林保全喺家中猝逝，令人感到惋惜。最近有指喺連聲演技安(現稱胖虎)嘅資深配音員陳卓智亦已經離職無綫，至於佢嘅動向就無向外界公佈。

陳卓智
該消息係由無綫嘅一位配音員嘅Facebook傳出，佢喺Facebook留言表示：「我童年所認識的胖虎就是你… 而現實中你是大家的胖虎，每次聽你唱『我叫做胖虎，我係小霸王』的時候，總會由心笑出來…就算日後胖虎的聲音由誰替代，在我心目中你就是唯一的胖虎…感謝你的聲音陪伴著我成長，有緣再會~! 」

陳卓智喺94年開始做配音員，97年4月就加入無綫配音組，一做就做咗18年，到今年4月離職。除咗配技安之外，佢仲有唔少經典代表作，包括《寵物小精靈》嘅小次郎、《柯南》嘅元太、《心動季節》嘅有馬總一郎及《Running Man》嘅HAHA等等。

邊個會做「新技安」呢？
其實《多啦A夢》入面最令人熟悉嘅主要配音員只係剩返配靜宜(現稱靜香)嘅梁少霞，負責聲演叮噹及大雄嘅林保全同盧素娟已離世、阿福(小夫)黃鳳英離開TVB幾年，連大雄媽媽(區瑞華)都已退休。隨著咁多位配音員嘅離世同埋離職，以後大家睇《多啦A夢》可能要啲時間適應。

各人還在，只係把聲……