邊個話唔起眼？周星馳電影綠葉你一定記得

twostreetman · 发表于 2015-6-12 00:04:53

近排因為幫囝囝報11個興趣班搏升名牌小學嘅『進取』媽媽，俾網友發現佢好似係電影《國產零零漆》嘅杜鵑。原來呢班星爺身邊嘅綠葉一早已經深入民心！而家一齊數吓有邊啲先！

李健仁
經常喺周星馳電影中扮演醜角，最記得嘅一定有《食神》入面嘅學生妹、《唐伯虎點秋香》入面嘅搶匪同埋《九品芝麻官》嘅如花。如花可以話係周星馳電影入面經典中嘅經典。無論三歲定八十歲，每次見到呢個男人化濃妝紮晒辮撩鼻，一定會笑到噴飯。呢個名仲令如花呢個名「等同」唔靚嘅女仔，影響力真係好大。

八兩金
八兩金亦喺周星馳電影多次出現，代表作有《食神》入面嘅學生哥、古惑仔，同埋《喜劇之王》嘅Pierre。《食神》扮古惑仔時，佢戴條粗金鍊，個身un吓un吓咁講咗句『爭咩呀？溝埋嚟做瀨尿牛丸丫笨！』就連佢自己都笑咗。《喜劇之王》Pierre嘅尊容加上耳仔有蟲頭髮有曱甴，睇得出八兩金真係好敬業，雖然從來都無做過主角，但係都可以家傳戶曉，都真係要俾個『讚』佢囉！

何文輝
《少林足球》中嘅醬爆，憑著頭大身細嘅宅男外表，將呢個『充滿夢想』嘅角色表現得入型入格。佢講「我醬爆感覺到喺呢個 moment，要爆啦！」，加埋佢首『醬爆之歌』，真係燃點起大家心中嘅一團火，想……打佢一身！

古明華
古明華攞完獎之後，個個先發現佢啲戲好！但係想當年，佢仍然係做啲二打六角色嘅時候，佢都已經好敬業樂業。就好似佢喺《國產零零漆》入面飾演貪錢公安，就將內地特有嘅賄賂文化表露無遺，嗰幕「揮手送上路」可以話係經典cap圖之一。

鄭文輝
喺《喜劇之王》入面一路食甜筒一路學人收陀地嘅甜筒輝，由於長相『單純』，兼且仲夠膽彈黑社會大佬嘅『雀仔』，嗰種天真無邪嘅眼神同喊聲真係令到觀眾畢生難忘。當然係同一場戲，全身赤裸被星爺彈『雀仔』嘅果位小朋友亦十分搶鏡啦！同好多星爺綠葉一樣，佢本身係幕後人，因為「身懷絕技」先被星爺發掘。

Vandem
齋講Vandem呢個名你可能唔知係邊個。佢就係喺《算死草》入面，葛民輝臨俾人斬頭前，送咗隻雞髀比個印度警衛(收喺邊？自己諗啦)，你一定會即刻『哦～』一聲。雖然冇對白，但係佢食雞脾個樣就夠令你印象難忘啦！