千奇百趣唔畀你上機嘅理由

查理阿蛋 · 发表于 2015-10-31 01:10:26

上唔到飛機有好多理由，可能係你自己搞錯時間、證件有問題、帶有違禁品等等，不過有時更加會係飛機上嘅機組人員唔俾你上飛機，一齊黎睇下有乜野既理由？

－太過政治取向
05年曾經有位女仕－Lorrie Heasley乘搭美國西南航空時著了一件印有時任總統喬治布殊等人嘅Tee，上面仲寫有不文字句，機組人員要求佢一係反轉件衫黎著，一係就落機，最後佢選擇了落機，事件成為一單大新聞。估唔到一個號自由民主嘅國度，竟然會因為一件衫而被迫落機。唔知我地好鍾意著哲古華拉Tee個位議員又有無事呢？不過因為政治上唔到，係香港已經唔算新聞啦係嘛。

(圖片來源: activisttshirts@tumblr)
－太沉迷社交媒體
而家嘅人總係機不離手嘅低頭族，不斷去更新自己個啲相或者Facebook、Twitter、Instagram等等。係2010年，有份拍變型金剛嘅演員Josh Duhamel就因為係起飛前仍然上網玩Twitter而被趕落機，真係明星都無面畀。不過而家航空公司都陸續有提供wi-fi服務，之後你想點玩都唔怕啦。

(圖片來源: Brittany campbell@flickr)
－體臭太勁
體臭太勁而唔俾上機聽落有啲奇怪？咁可能係你孤陋寡聞啦，因為體臭太勁而被拒登機嘅案例其實都唔少。事件發生係加拿大航空某班機上，曾經有位乘客因為被其他乘客投訴體臭令人太難頂而拒絕佢上機，結果個位人兄第二日先至可以離境。雖然好似有啲誇張，但係十幾個鐘困係一個密閉空間入面，真係唔敢想像。

(圖片來源: abeardedpretzelslife@tumblr)