TVB西片《異形》系列前兩部重配版（第一部）及三配版（第二部）配音表

JVT

影片名稱 異形 Alien
（全系列第一部，由列尼·史葛執導，該片開創科幻恐怖電影嘅新紀元，歷經四十幾年影響力未有衰減）


首播日期 27/2/1987（明）


重播日期 28/5/1989（翡）、30/12/1989（明）、22/9/1991（明）、21/6/1992（明）、15/11/1993（明）、8/4/1995（明）、21/4/1996（明）、?/?/199?（明）、?/?/200?（明）、17/9/2004（明）、9/8/2008（明）、31/7/2022（明）


播放頻道 明珠台、翡翠台


備註 1979年美國電影


配音員 角色名稱 演員

盧素娟（已故，常配）——艾·寶莉（角色全名引用自第四部，Sigourney Weaver飾演）
（台詞讀佢嘅姓氏有時讀成“利寶莉”，女主角，韋倫油谷集團商業拖船諾斯杜姆號三副，憑藉機智冷靜嘅頭腦同絕佳嘅運氣成為全船唯一生還者）
P.S.：據資料顯示，該角色首配版由曾慶珏聲演。

張炳強（退行，炳強叔算哩個演員嘅半個常配）——艾斯（Ian Holm飾演，演員已故）
（反派，120A2型機械人，諾斯杜姆號出發前兩日臨時被公司指派為駐船科學官，忠實執行韋倫油谷集團將異形標本帶翻地球分析並可以犧牲船員嘅指令）

盧國權——達拉斯（Tom Skerritt飾演）
（男主角，滿面鬍鬚嘅諾斯杜姆號船長，帶領两名船員喺LV426星球上嘅廢棄外星太空船探索嗰陣發生事故，影片中後段喺通風井裡面遭異形突襲身死）
P.S.：據資料顯示，該角色首配版由譚炳文聲演。

陳永信——柏加（Yaphet Kotto飾演，演員已故）
（諾斯杜姆號隨船黑人工程師，對太空船改變原航線要降落喺LV426極其不滿並且一日提住要分花紅，影片後段用噴火槍燒毀反派軀殼，最終被異形所殺）

黃麗芳——柏麗（Veronica Cartwright飾演）
（諾斯杜姆號嘅短髮女船員，探索LV426廢棄外星太空船嘅其中一位隊員，影片末段同黑人工程師去攞冷卻劑嗰陣撞到異形，喺極度恐懼之中畀異形殺死）

招世亮——祈連（John Hurt飾演，演員已故）
（諾斯杜姆號船員，探索LV426廢棄太空船嗰陣單獨索降誤入異形巢穴結果畀抱面蟲纏住陷入昏迷，影片中段突然甦醒之後冇耐就因為異形破胸而出慘死）

源家祥（已故）——白列（Harry Dean Stanton飾演，演員已故）
（諾斯杜姆號船員兼黑人工程師嘅助手，平時一味附和黑人工程師，影片中段喺搵貓期間被急劇長大嘅異形殺害，令眾人瞬間意識到異形嘅巨大危險性）

曾佩儀——Mother（全片冇提過叫咩名堂，Helen Horton聲演，配音員已故）
（諾斯杜姆號主電腦，影片末段提示太空船即將進入自毀狀態並進行時間倒數）




影片名稱 異形續集 Aliens
（全系列第二部，由占士·金馬倫執導並且將影片風格轉為動作片類型，該片雖然係續集但係喺觀眾心目中嘅地位不亞於第一部）


首播日期 31/7/1988


重播日期 21/10/1989、29/9/1991、28/6/1992、18/5/1993、8/8/1993、2/7/1994、15/4/1995、28/4/1996、?/?/199?、?/?/199?、24/9/2004、16/8/2008、7/8/2022


播放頻道 明珠台


備註 1986年美國電影


配音員 角色名稱 演員

陸惠玲（有人話碌Lane配得唔夠有力不過本人覺得質量唔差得過娟姐嘅版本）——艾·寶莉（角色全名引用自第四部，Sigourney Weaver飾演）
（第一女主角，57年前諾斯杜姆號災難事件唯一生還者，現時喺貨運碼頭做嘢，因LV426殖民地突然失聯而被韋倫油谷集團特聘為美國移民海軍陸戰隊顧問）
P.S.：據資料顯示，該角色首配版及重配版均由盧素娟聲演。

凌晞（喺西片成日聽到Heidy把聲貌似配音組幾睇重佢）——蕾佩嘉（Carrie Henn飾演）
（暱稱“妞德”，第二女主角，獲二級公民獎嘅12歲LV426移民，喺異形襲擊殖民地之後失去所有家人孤身躲避多日，後來同第一女主角產生母女般嘅感情）
P.S.：據資料顯示，該角色首配版及重配版分別由黃麗芳同鄭麗麗聲演。

蘇強文（阿So配軍佬畀人一種硬朗得嚟又瀟灑幽默嘅feel）——希斯（Michael Biehn飾演）
（男主角，美國移民海軍陸戰隊下士兼第二隊領隊，部隊畀異形重創之後接過指揮大權，手把手教第一女主角使用武器，最後畀異形血整損塊面但依然倖存）
P.S.：據資料顯示，該角色首配版及重配版均由盧國權聲演。

李錦綸（真係配出咗成肚壞水嘅味道）——白卡達（Paul Reiser飾演）
（反派，韋倫油谷集團派嚟嘅代表，對第一女主角動之以情誘之以利氹佢重返LV426，其實始終都只有一個目的就係想將異形樣本帶翻地球用作生化武器）
P.S.：據資料顯示，該角色首配版及重配版分別由黃健強同鄧榮銾聲演。

陳卓智（Kenji把聲配得夠晒衰格）——赫臣（Bill Paxton飾演，演員已故）
（仲差4個禮拜退伍嘅美國移民海軍陸戰隊隊員，把口得罪人多稱呼人少，部隊畀異形消滅大半之後一度情緒失控，影片中後段勇猛作戰之際畀異形偷襲捉走）
P.S.：據資料顯示，該角色首配版及重配版分別由郭立文同郭志權聲演。

謝潔貞（資深配音員當中御姐聲嘅代表）——華雅（Jenette Goldstein飾演）
（美國移民海軍陸戰隊隊員，身體素質勁fit唔輸蝕畀啲男人，疑似同崔格關係唔尋常，影片中後段隻腳畀異形血腐蝕導致走唔甩，同葛文攬埋用手榴彈自殺）
P.S.：據資料顯示，該角色首配版及重配版均由袁淑珍聲演。

招世亮（招sir啲語氣聽得出有故意模仿機械感）——主教（Lance Henriksen飾演）
（駐美國移民海軍陸戰隊基地基韋站机械人，部隊陷入生死存亡之際自告奮勇爬管道出去外面遙控登陸船救大家，影片末段又喺危急關頭救兩位女主角一命）
P.S.：據資料顯示，該角色首配版及重配版均由張炳強聲演。

雷霆——葛文（William Hope飾演）
（美國移民海軍陸戰隊新任中尉指揮官，由於經驗淺所以受隊員輕視，影片中段畀裝甲車內嘅裝備掟暈，後面喺通風槽又救唔走華雅被迫用手榴彈一齊解脫）
P.S.：據資料顯示，該角色首配版及重配版分別由張英才同陳永信聲演。

陳欣——艾普（Al Matthews飾演，演員已故）
（美國移民海軍陸戰隊黑人中士兼第一隊領隊，留二撇雞，作為老兵對自己嘅部隊懷有強烈榮譽感，影片中段同隊員誤中異形埋伏，混戰當中畀異形捉走）
P.S.：據資料顯示，該角色首配版由馮永和聲演。

潘文柏——崔格（Mark Rolston飾演）
（美國移民海軍陸戰隊隊員，疑似同華雅關係唔尋常，降落前佢架攝影機曾出現問題，影片中段畀異形血彈到腐蝕咗半邊面，死前手上嘅噴火器燒到裝甲車）
P.S.：維基百科張冠李戴，阿柏（潘文柏）配嘅角色唔係郭維而係崔格。

梁志達——霍治（Ricco Ross飾演）
（美國移民海軍陸戰隊黑人隊員，部隊中伏之前負責保管大家收繳上嚟嘅彈匣，結果喺異形捉走醫官嗰陣畀佢支噴火槍射中全身著火繼而跌死）
P.S.：據資料顯示，該角色首配版由招世亮聲演。

曾秀清——狄卓（Cynthia Scott飾演）
（疑似美國移民海軍陸戰隊醫官，第二女主角被發現之後幫佢做過身體檢查，部隊中伏嘅時候第一個畀異形捉住，慌亂之際唔小心用噴火槍燒著霍治）

黃子敬——盧方（Paul Maxwell飾演，演員已故）
（韋倫油谷集團高層，質詢第一女主角關於諾斯杜姆號被毀一事嗰陣坐中間主席位，會後又透露畀第一女主角聽LV426變咗做有人居住嘅殖民地）
P.S.：據資料顯示，該角色首配版由張英才聲演。

林元春——費娜（Collette Hiller飾演）
（美國移民海軍陸戰隊APC機師，負責接送隊員往返，喺準備接走倖存隊員嘅時候畀異形從背後襲擊，從而搞到APC失控墜毀）

翟耀輝——史萬（Daniel Kash飾演）
（美國移民海軍陸戰隊隊員，APC準備起飛去接倖存隊員之前曾經發覺船上有異形嘅分泌物，不過畀機師催多兩催冇再為意，隨後慘遭異形毒手）



以下為個人感想，僅供參考：

唔知係唔係TVB嘅翻譯人員翻譯第一部嘅時候意思唔多準確，第一部嘅配音台詞好多時會出現詞不達意甚至完全唔係一個意思嘅情況，搞到有啲場口感覺唔多自然。而開頭聽到第二部要第三次配音嘅時候，老實講本人原來係唔抱太大期待（畢竟比較念舊），點知配出嚟效果仲幾唔錯下，覺得驚喜之餘仲隱約有啲希望第一部可以再重配多次配得自然貼切啲添。所以其實配音冇話舊版一定好或者新版一定差，最主要都係睇質量。如果新版可以配得更加好，都一樣值得讚賞。

master

异形好恐怖啊

lcw_008

异性系列一直我都觉得拍得几有水准。

86214

异形正到爆炸

JVT

gouki3 发表于 2022-9-9 23:02
第一部嘅配音台詞好多時會出現詞不達意甚至完全唔係一個意思嘅情況

的确唔明点解会译到咁

gouki3

第一部嘅配音台詞好多時會出現詞不達意甚至完全唔係一個意思嘅情況<-----重配後既第一部都唔好得幾多，睇住字幕聽過英文，一配就講到古古怪怪，例如尾段:女主角關哂自爆制仲有自爆廣播，英文明明女主角係嗌:主機，我已重啟系統啦，配音卻話: 電腦，要毀滅埋D異形呀，WTF，翻譯個人係咪唔識英文?

JVT

bayman 发表于 2022-8-29 10:32
聽落第二種可能性大啲

如果系短时间内重配嘅话一般属于第一种情况，如果部电影长时间未重播而且一重播就换配音就基本上属于第二种