註冊十週年有感，輕輕派雪慶祝下

condor

前排說明：因為相信論壇嘅大部分人都應該識得睇繁體字同講廣東話，加上平時冇乜機會用繁體字，所以呢篇感想就想試下用繁體字+廣東話風格嚟寫。如果有表述唔啱，希望大家可以指出修正。

唔經唔覺，我都註冊咗成十年。從初中生到研究生畢業再到出嚟做嘢，雖然最近兩三年比較少上嚟吹水，但係都會間唔中，喺某日嘅晚上，打開hard disk入面啲粵配動畫——「進擊的巨人」、「吹奏吧管樂團」、「輕音少女」、「東京喰種」呢啲經典動畫嚟重溫。當然一個最重要嘅原因係冇乜有興趣嘅新動畫睇。。。

依家諗番轉頭，註冊嘅嗰陣都仲記憶猶新。我完全係睇TVB從細睇到大，雖然喺大陸只可以睇到翡翠臺。但係嗰陣時翡翠臺嘅動畫節目都比宜家所有電視台加埋仲多（？），朝頭早有「玻璃面具」、「魔導少年」、一個玩彈珠嘅唔記得叫乜名等等。下晝有「守護蛋精靈」、「光之美少女」、「battle spirit」等等。
一個小學嘅塞豆窿睇到「玻璃面具」呢啲現實向動畫有幾震撼。

嗰陣時真係好中意粵配動畫，但係又唔知點樣搵資源，而且嗰陣時仲有粵配嘅主題曲同片尾曲。所以我甚至攞手提電話對住個屏幕嚟錄影、錄音，仲會叫屋企人嗰陣細聲啲哈哈。

後嚟上中學，比較識用電腦啦，就開始喺網上搵資源。一開始，相信唔少人都係一樣，搵到嘅係一個k字頭嘅網站。當然佢畫質相當之低，而且好多時候播放出錯。嗰陣時我仲去down咗幾個提取瀏覽器Cache嘅軟件，先喺瀏覽器播放一次，跟住提取啲片段出嚟，合併、轉碼，終於得到「一集」。

最初搵到飄雪係因為嗰陣時相當想回味「魔導少年」，一入飄雪深似海，資源嘅質素同齊全令人瞠目結舌，嗰陣時3X0網盤仲未折埋，好多資源甚至都要度盤同3X0兩條link。喺呢度向論壇所有嘅發佈者致敬！嗰陣時仲唔識得轉繁體字嚟搜索，所以反而好多資源都搵唔到哈哈。

依家都記得好清楚，第一次睇到「男子高中生的日常」、「無聊西餐廳」、「齊木楠雄的災難」笑都有幾7彩。睇咗「明星學生妹」先知偶像番可以做成咁，後嚟順帶追埋RCVO配音組嘅「LoveLive粵語翻唱企劃」。睇到「東京殘響」、「迦南」、「翠星上的加爾岡尼亞」嘅時候，震驚於佢嘅世界觀。呢啲種種，直程係俾我嘅學生時代留低好多難忘嘅回憶。

同時都認識咗幾多配音員，印象中嗰啲聲音終於對上咗名。最可惜嘅就係早早退役嘅羅杏芝，「輕音」裏面嘅秋山澪印象係真嘅深刻。仲有啊Lu、元春姐、凌晞、柚子蜜等等，都貢獻咗好多精彩聲音。

嗰陣仲追埋「聲朋俱樂部」個節目，第一次聽到自己熟悉語言嘅「聲優」電臺節目。印象最深刻嘅就係有一集講配音動畫製作流程嘅，聰聰？同個主持人「雲尼」喺呢集做出嘅節目效果真係爆笑。
（不過呢個節目網上好少資料，擒牆都search唔到乜野資訊。其實主持人把聲都好甜好好聽，但係我至今都唔知佢嘅藝名係唔係叫呢個「雲尼」，呢個名同「鋼之鍊金術師」嘅女主角一樣樣嘅？）




嚟咗飄雪呢度我先知道J2嘅存在，同時都學到幾多影音知識，軟字幕硬字幕之類。我仲記得嗰陣時飄雪仲有「配音員相關嘅每日答題」，問A角色要做乜野，佢會選擇去搵邊個，選項係配音員嘅名。
其實題目要求都唔低，你首先要熟絡A角色套戲嘅劇情，知道佢係動畫入遍做嘅嘢，要搵嘅B角色係邊個。然後你又要知道B角色係邊個配音嘅。不過都好好玩。


嗰陣時啱啱好係暑假，我就同幾個喺飄雪識嘅fri組建咗個題庫，嚟飽和式做題，為咗每日嘅十雪點。午後茶會板塊仲有討論題目嘅帖。嗰陣啲題目對我呢個新人嚟講真係非常有益，我可以瞭解到一啲冇睇過嘅動畫片段，跟住有興趣我再去搜索搵原片。

不過可惜嘅係，嗰陣時識嘅fri，都好耐冇登錄過囖~~sad

後嚟，我都試過想加入發佈者家庭，幫論壇做啲貢獻。主要亦都係想玩玩啲壓制技術。所以我就喺原盤區搵咗出叮噹貓電影試壓，都係唔過癮，但係搵咗一圈，都搵唔有辦法錄製香城節目嘅fri。咁算數咯，玩合成。

嗰排播緊「幪面超人鎧武」，我又比較鐘意特攝，咁就聯繫咗dreamstar大佬，借用TVB style嘅音軌、字幕，都幾多謝佢。之後差唔多一年，我都享受咗做「發佈者」嘅感覺哈哈，每個星期係學校翻嚟，例牌咁打開Au對音軌，打開BD2sub字幕軟件對時間軸，樂此不疲。

再後嚟上咗高中，學業繁忙，「發佈者」生涯就此收檔。嗰陣啱好Viu臺開播，「東京喰種」竟然會有粵配版喔，真係犀9利。唔止，嗰陣「進擊的巨人」第二季仲係同日本差三集同步播放。宜家諗翻轉頭，嗰陣啲動畫真係既hit且多。我甚至有時候睇到日本新番嘅PV，我會去估佢幾時會上粵配，甚至同fri估係TXB定係VIU，最後套新番真係有咗粵配。每個暑假，動漫熱甚至會上一啲熱門IP嘅劇場版。嗰陣以為呢種趨勢會理所當然，點知……

到大學期間，對粵配動畫嘅熱情始終冇減到。冇新番，咁就「煲老藕」咯，補咗好多冇睇過嘅陳年動畫——「旋風管家」、「日常」等等，不過巧婦難為無米之炊，好多次一直loop動畫區嘅資源，發現睇過嘅越來越多，連載區從以前嘅兩三頁，到後嚟得翻唔夠半頁，無奈又心酸。

我一直認為，人對音頻嘅敏感度會係更高，至少對我嚟講，每次打開粵配動畫，聽到嗰個配音，都會將我拉翻嗰幾個暑假。開住部電腦，喺屏幕右下角播放動畫，同時打開Minecraft，遍睇動畫遍打game，開著個窗，有風吹入嚟，可以聞到嗰啲俾陽光曬熱，但係又帶住少少花香嘅空氣。

總而言之，好多謝飄雪嘅各位CEO同資源發佈者咁多年嘅堅持。無論幾多年都好，粵配動畫呢個文化都係屬於我哋嘅共同回憶。唔講咁多長氣嘢啦，唔知有冇人得閒睇曬呢篇嘢咧哈哈。

inyesha

前排？多谢楼主

凌夜轩

很高兴可以来到尼个论坛

katemoss

十年大佬

歲月靜好

恭喜樓主註冊十週年啦！多謝樓主派雪點啊！

文哥

多谢老细派雪

RMMY

可以搵到呢个论坛真系我噶幸运，粤语最强！

classical

我已经唔记得咗我係点样搵到飘雪啦，楼主居然仲记得以前嘅嘢，我真係好佩服你啊，宜家TVB几乎冇动画播加上配音组大裁员，令到我呢个动画L心灰意冷，有生之年巨人应该冇粤语版啦

歲月靜好

註冊十週年真係唔容易啊，係有血有淚囖！

喜粤201906

inyesha 发表于 2025-10-31 20:13
前排？多谢楼主

恭喜饮到头啖汤